logos

Berriak

Elikadura Jasangarria lantzen ari direla azaldu dute Oiartzungo ikasleek Udaletxean


2013/2014 ikasturte amaieran, Oiartzungo Eskolako Agenda 21 programan parte hartu zuten ikasleek energia eta kontsumo arduratsuari lotutako hainbat konpromiso eta eskaera aurkeztu zizkioten Udalari, besteak beste: gelatik ateratzerakoan argiak itzaltzeko ardura, kaleko argiteria modu eraginkorragoan erabiltzeko beharra, etab.

Udaleko ordezkariek eskaera hauek aztertu dituzte eta, urtarrilaren 16an izandako Eskolako Agenda 21en lehen Udal-foroan, 2014. urtean burutu diren energiari lotutako udal-ekimenen berri eman diete Aiora Alkateak eta Mailu zinegotziak Elizalde eta Haurtzaroko ikasleei. Programan parte hartzen duten 1.400 bat ikasleen ordezkaritza batek Udaletxeko Pleno Aretoan adi entzun dituzte Udal ordezkariek emandako azalpenak. Besteak beste, honakoa jakinarazi diete: Altzibarko gune zaharrean kale-argiteriaren instalazioa aldatu dutela; Kale Berria eta atzeko plazako argiteria ordezkatu eta hauen potentzia jaitsi dutela; Agerrealdeko kale-argien potentzia murriztu egin dutela.EA21en udal-foroa

Dagoeneko eskarmentua dute Oiartzunen, izan ere aurtengoan hamaikagarren urtea da Oiartzungo ikastetxeek Eskolako Agenda 21 programa garatzen dutena. Honez gero, ura, energia, hondakinak, Mugikortasuna, biodibertsitatea eta kontsumo arduratsua bezalako gaiak aztertu dituzte eta, bai eskolan, herrian, zein etxean, hainbat alderdi hobetzeko beharraz jabetuta, urtez urte, hainbat konpromiso hartu dituzte.

Ikasturte honetan, Elikadura Jasangarria landuko dute eta egindako lana eta emaitzak Udalari aurkeztu asmoz, maiatza aldera berriz ere udaletxean elkartzea aurreikusten dute ikasleek. Gainera, aurtengo gaia lantzen laguntzeko maskota berezia dutela jakinarazi dute ikasleek: Sagartxo.

Kontsumo arduratsuaren azoka


Azoka Lezo 2013

Hirugarren edizioa Karlos Saldise plazan egingo da azaroaren 29an, eta herritarrak kontsumo arduratsuarekin bat eginez, hondakinak murriztearen eta berrerabilpena sustatzearen garrantziaz kontzientziatzea du xede.

Karlos Saldise plazak Kontsumo Arduratsuaren Azokaren hirugarren edizioa hartuko du azaroaren 29an. Horrela eman dute jakitera gaur goizean Ainhoa Zabalo alkateak eta Aitor Gonzalez Izadi21 Ingurumen Aholkularitzako teknikariak. Goizean zehar, bigarren eskuko objektuen salmenta, hondakinen berrerabilpen tailerra edo-eta erantzukizun sozialaren esparruan aritzen diren hainbat elkarteren stand-ak izango dira.

Lezoko Udalak antolatuta, datorren azaroaren 29an Kontsumo Arduratsuaren Azoka izango da Karlos Saldise plazan, azaroaren 22tik 30era ospatzen den Hondakinak Prebenitzeko Europako Astearekin bat eginez. Helburuak, aurreko edizioetako berak mantentzen dira. “Batetik, herritarrak kontsumo arduratsuaren baitan kontzientziatzea nahi dugu, eta euren artean hondakinak murrizteko eta berrerabilpena bultzatzeko jarrerak sustatu nahi ditugu. Eta bestetik, Eskolako Agenda 21 egitasmoan dabiltzan zentroen lanak kalera atera nahi ditugu”, azaldu du Ainhoa Zabalo alkateak.

Kontsumo Arduratsuaren Azokak kontsumitzaile arduratsuak heztea du beste helburuetako bat. Eta bide horretan, ezinbestekoa da ohiturak aldatzea eta patxadaz aritzea. Horrela uste du behintzat alkateak. “Gure gizarte honetan ia ohitura bilakatu da guztia abiadura handiz egitea. Bada, har dezagun patxada apur bat erosketak egiterakoan gure buruari galdetzeko ea erostera goazen hori behar dugun, non ekoitzi den, nork ekoitzi duen, zein baldintzetan egin den, hondakinik sortuko ote duen, eta abar”.

 

Herritarren parte-hartzea

Azoka Karlos Saldise plazaren txapelaren pean jarriko da, eta herritarrek etxean dituzten bigarren eskuko objektuak saltzeko aukera izango dute: arropak, tresnak, liburuak edo-eta bestelako objektuak. Baldintza bakarra, produktuak erabilgarri egotea da. Horretarako, aurrez izena eman behar dute 943 492215 telefono zenbakira deituz edo azokalezo@gmail.com posta elektroniko helbidera idatziz

Aitor Gonzalez Izadi21eko teknikariak aurreratu duenez, herritar bakoitzak bere salmentarako espazioa izango du eta Lezoko Udalak oihalezko poltsak banatuko dizkie saltzen dituzten produktu/objektu horiek bertan sartu eta erosleari emateko.

Herritarren salmenta postu horiez gain, bestelako postuak izango direla iragarri du Aitor Gonzalezek. Eskolen gunea izango da, bertan eurek bildutako produktuak saltzeko, zein hazien tailerraren berri emateko; nekazal gunea, Lezon bertan ekoizten diren garaiko nekazal produktuen erakustoki; erantzukizun sozialaren esparruan aritzen diren elkarteak izango dira, kontsumo arduratsuaren kontzeptu zabalaren pean, besteak beste, animalien eskubideak edo-eta banka etikoak lekua badutelako. Goiener, Askekintza taldea eta Fiare banka etikoko Oarsoaldeko ordezkariak gure artean izango ditugu. 

Amaitzeko, beste hiru hitzordu nabarmendu ditu: 11:30etatik 12:30etara egingo den hondakinen berrerabilpen tailerra, gaztetxoei plastikozko hondakinekin karterak, brotxetak, autoak eta abar nola egiten diren erakusteko –tailerrean parte hartu nahi dutenek brika edo plastikozko botila eraman beharko dute–; 13:00etan Udal ordezkariek egingo duten auzo-konpostaren udal aurkezpen ekitaldia, eta 13:15ean egingo den pintxo-dastaketa, azokaren aurtengo edizioa ahoa goxatuz agurtzeko.

 

Aitor Gonzalez eta Ainhoa Zabalo

Elikadura jasangarria landuko dute Lezoko ikasleek


Lezoko EA 21 udalbatzaHorrela  iragarri zuten joan den asteartean udaletxean ospatutako foroan

Joan den asteartean, hilak 21, ikasturte honetako Eskolako Agenda 21en lehen foroa ospatu zuten Lezo Herri Eskola, Lezo Institutua eta Pasaia-Lezo Lizeoko ikasleek. Programan parte hartzen duten 800 bat inguru ikasleen ordezkaritza bat Udaletxeko Pleno Aretoan izan zen Ainhoa Zabalo alkatearekin eta Leire Beteta Ingurumen-teknikariarekin.

2013/2014 ikasturte amaieran, Lezoko Eskolako Agenda 21 programan parte hartu zuten ikasleek kontsumo arduratsuari lotutako hainbat eskaera aurkeztu zizkioten Udalari, besteak beste: berrerabilpena eta birziklapena sustatzeko kanpaina gehiago egitea, animalia eta landare exotikoen naturan sortzen dituzten kalteak murrizteko neurriak ezartzea, ura zein energia aurrezteko eta modu arduratsuan erabiltzeko neurriak ezartzea, eta abar.

Udaleko ordezkariek eskaera hauek aztertzen jardun dute uda garaian eta, astearteko foroan honakoa jakinarazi diete ikasleei: gaikako bilketan ikasleek duten garrantzia; Olatzar erreka bazterrean (Baratza Parkearen ondoan) anfibioen berreskurapenerako putzua egin dutela eta aurki bisitatzeko aukera izango dutela; energia-eraginkortasuna handitu eta argi-kutsadura murrizteko neurriak ezartzen ari direla; auzo-konposta egiteko kanpaina abian jarri dela herriko 6 guneetan.

Honez gain, azaroaren 29an Kontsumo Arduratsuaren 3. Azokaren antolatze-lanetan ari dela Udala eta eskolek ere bertan leku izango dutela iragarri dute udal ordezkariek.

 

Maskota berezia

Super berenjenaIkasleek, beren aldetik, ikasturte honetan Elikadura Jasangarria landuko dutela iragarri dute. Aurtengo gaia lantzen laguntzeko, gainera, maskota berezia izango dutela aurreratu dute: Superberengena. Ikasturtean zehar egindako lana eta emaitzak Udalari aurkeztu asmoz, maiatza aldera berriz ere udaletxean elkartzea aurreikusten dute ikasleek.

Dagoeneko eskarmentua dute Lezon, izan ere aurtengoan zazpigarren urtea da Lezoko Udalak eta ikastetxeek Eskolako Agenda 21 programa garatzen dutena. Honez gero, ura, energia, hondakinak, biodibertsitatea eta kontsumo arduratsua aztertu dituzte eta, bai eskolan, herrian, zein etxean, hainbat alderdi hobetzeko beharraz jabetuta, urtez urte, hainbat konpromiso hartu dituzte.

Ikasleek kontsumo iraunkorraren inguruan egindako eskaerei erantzuna eman die Udalak


Porru kirolariHiriko zazpi ikastetxetako ia 4.000 ikaslek kontsumo iraunkorra gaia aztertu zuten 2013/2014 ikasturtean zehar Eskolako Agenda 21 egitasmoaren barruan, eta asteartean (urriak 21) iaz, ikasturte amaieran Udalari egindako proposamenei erantzun eman die Udalak.

Cristobal Gamon LH, Koldo Mitxelena BHI, Bizarain ikastola, Langaitz BHI, San Jose Gurutzearen Alabak, Don Bosco eta Telleri ikastetxeetako ordezkariak Udaleko Pleno Aretoan eseri dira Julen Mendoza alkateak eta Jose Manuel Ferradas, Mendi eta Ingurumeneko zinegotziak azaldu behar zietena entzutera.

Ikasleek egindako eskaerak kontsumo iraunkorraren esparru ezberdinekin zuten lotura (Energia, Ura, Hondakinak, Herriko Kontsumoa, Bioaniztasuna eta Mugikortasuna). Zerrenda luze horretan, esate baterako, honako eskaerak zeuden jasota: materia organikoaren bilketarako baliabideak jartzea, uraren kontsumoa kontrolatzeko sentsibilizazio kanpainak burutzea, Oiartzun ibaia garbitzeko kanpainak antolatzea edo bidegorria zabaldu eta dagoena konpontzea. Honela, Julen Mendozak eta Jose Manuel Ferradasek puntuz puntu argitu dute eskaera-zerrenda, besteren artean, honakoak azalduz: une honetan Oinezko eta Bizikleta bidezko Mugikortasun-Plana osatzen ari direla; Atlantikaldiaren barne Oiartzun ibaiaren garbiketa egin zela auzolanean; 2015ean materia organikoa biltzeko 5. edukiontzia kalean jarriko dela; Fanderia, Agustinak eta Gaztainon auzo-konposterako guneak dagoeneko abian direla; etab. Bai eskaera/erantzun zerrenda osoa, nola Errenteriako Eskolako Agenda 21i buruzko informazio gehiago ingurumena.errenteria.eus helbidean aurkitu daitezke.

Azkenik, saioa amaitzeko, ikasleek aurten Elikadura Jasangarria landuko dutela azaldu dute, eta horretarako, Porru Kirolaria bidaia-lagun izango dutela aurreratu dute.

Udalbatza Errenteria

Udalak auzo-konposta egiteko sei gune egokituko ditu


Presentación cartelLezoko Udalak auzo-konposta egiteko sei gune egokituko ditu. Hain zuzen, Aralar kalean, Lopenen, San Pedro-Pisben, Arretxe-Txulotxon, Altamiran eta Alde Zaharrean. Guneak egokitzeko lanak iraila bukaeran hasiko direla aurreikusten da, eta, ongi bidean, urte bukaera baino lehen izango da auzo-konposta egiteko aukera.

Lezoko Udalak beste urrats bat emango du hondakinen kudeaketan, eta udazken honetan auzo-konposta egiteko sei gune jarriko dira martxan. Horrela eman dute jakitera Ainhoa Zabalo alkateak, Leire Beteta Ingurumen teknikariak eta Aitor Gonzalez, Elkarrekin21 enpresako ordezkariak. Egitasmoak 60.000 €tik gorako aurrekontua du, eta Foru Aldundiak 33.625 € finantzatuko ditu.

Informazio gehiagorako www.lezo.net

Munduan ekoiztutako elikagaien herena alferrik galdua


Txostena FAOFAOk 'Global food losses and food waste' txostena argitaratu du. Bertan jasotakoaren arabera, munduan ekoiztutako elikagaien herena (1.3000 milioi tona) alferrik galtzen da. Azterlanak elikagaien galera (ekoizpen, bilketa, edo prozesatze fasean gertatu ahal dena) eta alferrik galtzea bezalako kontzeptuak desberdintzen ditu. Azken kontzeptu hau oso hedatua dago herri industrializatuetan, bai ekoizle zein kontsumitzaileok jateko modu egokian dauden elikagaiak zaborretara botatzen ditugulako batik bat. 

Herrialde aberatsetako kontsumitzaileek urtean 222 milioi tona elikagai alferrik galtzen ditugu, subsahariar Afrikako elikagai ekoizpen osoaren pareko kopurua (230 tona). 

Informazio gehiagorako, ondorengo estekan irakur dezakezue aipatu txostena (gazteleraz): FAO txostena pdf 

Errenteriako ingurumenak txoko berria du


Ingurumen-eguna dela baliatuz, Errenteriako Udaleko Mendi eta Ingurumen Sailak webgune berria estreinatu du: ingurumena.errenteria.eus.

Errenteriako ingurumen web gunea

Kontsumo Arduratsua Lezoko Eskolako Agenda 21en Udalbatzan


Aurreko urteetako ohiturari jarraituz, Lezoko Herri Eskolako, Lezo Institutuko eta Pasaia-Lezo Lizeoko ikasle eta irakasleen ordezkariak 2013/2014 ikasturteko amaierako Eskolako Agenda 21en topaketetan elkartu dira. 

Aurtengoan, eskoletan KONTSUMO ARDURATSUA izan dute ardatz eta gai hau azken urteetan jorratutako gai ezberdinetara zabaldu dute. Hau da, Ura, Energia, Hondakinak eta Bioaniztasunari buruzko errepasoa egin dute, betiere, kontsumo arduratsuaren ikuspegitik. 

kontsumo arduratsua

Eskolarteko Forotik Udalbatzara

Astearteko foroan ikastetxeetako ordezkariek gai ezberdinen inguruan hartutako konpromisoen eta Udalari aurkeztu dizkioten eskaeren zerrendak lehenetsi zituzten, eta horretaz gain, Eskolako Agenda 21 programan parte hartzen duten eragileen (ikasleak, irakasleak, irakasle ez diren eskolako langileak, gurasoak, Udala) partaidetza nolakoa izan den baloratu zuten.  

Maiatzaren 29an, berriz, eskoletako ordezkariak Lezoko udaletxeko Udalbatza aretoan elkartu dira, astearteko saioan erabakitakoaren berri ematera. Hain zuzen ere, Udalari zuzendu dizkioten eskaeren artean, esparru bakoitzetik lehentasun handienekotzat hartutakoak honakoak dira:

  • URA: Herriko iturrien egoera egokia da, baina hauetako batzuk, behintzat, gurpildun aulkian doazenentzat erabilgarri jarri beharko lirateke
  • ENERGIA: Kale-argiteriaren egoera nolakoa den jakiteko azterketa egitea, argi kutsadura murriztu, energia aurreztu eta segurtasuna irabazteko neurriak ezarriz
  • HONDAKINAK: Jaietan zabor kopurua ahal den gehien gutxitzeko neurriak hartzea
  • BIOANIZTASUNA: Herriko kultura-aniztasuna balioan jartzeko ekimenak bultzatzea
  • KONTSUMO ARURATSUA: Eskolako Agenda 21 programa eta Tokiko Agenda 21 programan, Udalaren, gurasoen eta, oro har, herritarren parte-hartzea areagotzea 

Bestalde, Eskolako Agenda 21 programan parte hartzen duten eragileek (ikasle, irakasle, eskolako langile, guraso eta Udala) 2013/2014 ikasturtean izanda partaidetza balorazioa egin dute. Orokorrean ikasleen partaidetza egokitzat jo dute, eta baita irakasle zein eskolako bestelako langileena ere (nahiz eta apur bat hobetu dezaketen). Udalak zein gurasoek izan duten partaidetza, ordea, erdipurdikoa izan dela iritzi diote ikasleek, hobetu beharrekoa, alegia. 

Ondoren, datorren ikasturtean ELIKADURA JASANGARRIA landuko dutela aurreratu dute. 

Saioaren azken zatian, Udal-ordezkariek hartu dute hitza. Asko eskertu dute ikasleen lana eta aurten Udalak burutzea aurreikusten dituen ekintzen berri eman du: anfibioen berreskurapenerako urmael bat eraikitzea, energiaren monitorizazio proiektua, etab. 

Amaitzeko, ikasturte honetako Eskolako Agenda 21 programan parte hartu duten guztiei eskerrak emanez agurtu dute ikasturte honetako azken saioa. 

Eskolarteko foroa ospatu da Hondarribian


Aurreko urteetako ohiturari jarraituz, Hondarribiko Ama Guadalupekoa ikastetxea, San José ikastetxea eta Talaia Eskolako ikasle eta irakasleen ordezkariak Hondarribiko udalbatza aretoan bildu dira gaur goizean (maiatzak 15) Eskolako Agenda 21en eskolen arteko foroan. Parte-hartze foro honen helburua ikasturtean zehar egindako lana laburbiltzea, eskolek bere gain hartuko dituzten konpromisoen zerrenda adostea eta Udalari zuzendutako eskaerak lantzea izaten da.

Aurtengoan, eskoletan KONTSUMO ARDURATSUA izan dute ardatz eta gai hau lau arlori lotuta aztertzeko aukera izan dute: energia, hondakinak, mugikortasuna eta ura. Gaurko Eskolarteko Foroan 3 izan dira ikasleek eztabaidatutako eta adostutako gaiak:

  1. Kontsumo Arduratsuari lotuta eskola guztiek partekatutako konpromisoen zerrenda osatzea
  2. Ikasturte honetan zehar eragile ezberdinen partaidetzaren egoera zein izan den baloratzea (ikasleak, irakasleak, irakasle ez diren eskolako langileak, gurasoak, Udala)
  3. 2014-2015 ikasturtean landu nahiko luketen gaia adostea: ELIKADURA JASANGARRIA.

Eskolarteko foroa Hondarribian

Honenbestez, ikasturtea amaitu aurretik, eskolak Hondarribiko udal ordezkariekin bilduko dira ekaina hasieran, egindako lana aurkezteko, hartu dituzten konpromisoak zerrendatzeko eta Udalari zuzendutako eskaerak planteatzeko.